2020/12/22

Gabon zoriontsua izan!!!!

Gabonaldia heldu zaigu ta
jendea pozez gainezka;
ume txikiak beti opariez
ta Olentzeroz galdezka.

Garai hauetan gure bihotza
hainbat gauzez hunkituta,
sufritzen duen jendearekin                                                                                                             gehixeago elkartuta.

Heldu ta ume ondo igaro,
ingurukoei lagundu;
ta bihotzeko gogorkeriak
ahal den neurrian bigundu.
Irakasle/dinamizatzaile guztion partez,

 Gabon zoriontsuez gozatu,
 alaitasunez ospatu. 

                        (Ismael Izaguirre, moldatua)

Uribe Butroeko Berbalagun ekimenak Gabon zoriontsua opa dizue!!!

Ondo pasa eta zaindu!!!!!  Birusak ez gaitu mututuko!!!!!!

2020/12/20

Lehenengo talo tailerra, MARURI-JATABEN

Joan den ostiralean, abenduak 18,  Maruriko Berbalagun taldeak haren lehenengo  tailerra antolatu zuen, talo tailerra, hain zuzen ere. Deialdia egin genuen jakin barik zer nolako harrera izango zuen. Egia da, arrakastatsua izatea espero genuela, baina gure aurreikuspenak sobera gainditu genituen. Orotara 18 lagun bildu ginen Kultur Etxean, eta zein ondo pasatu genuen.


 

 

Begotxu gure talo-maistra izan zen eta benetan, berarekin prozedurak erreza zirudien. Haren azalpenak jarraituz lehenengoa agian ez hain ondo, baina bigarren taloa ederto atera zitzaigun. Izan ere, aparteko aukerak baziren han, txorizo,   txokolate, baita gaztaia ere dastatzeko parada baikeneukan


 

 

Umeak zein nagusiak guztiak joz eta zabalduz ibili ginen, eta ziur gaude talo-egile aditu bilakatu garela.

Adina ez zen aitzakia, eta guztiok izan genuen/genituen gurea. Han inor ez zen talo barik geratu. 

 

 

 

Gero oreak plantxara pasatu  genituen,

A, ze usaina!!!! Ze plazerra!!!

Galdera bakar-bakarra zegoen han, honako hau zen; nola dakizu buelta eman behar diozula? 

Hala ere, hemen ez dizuegu erantzunik emango, hurrengoan guregana etortzeko. Hurrengo argazkietan ikusiko duzuen bezala, merezi izango du.


Ez dut sarrera hau amaituko Jatabe Nekazal Kultur Elkarteari eskerrak eman gabe. Haiek taloak egiteko erabili genuen txakinarto irinaren ekoizleak dira, eta ze ona, benetan!!!. Baina, horrez gain, hogei bat irin-poltsa oparitu zizkiguten, parte hartzaileen artean banatzeko eta bakoitzak etxean taloak egiten jarrai zezan.
Eskerrik asko, bihotz-bihotzez!!!

Negua dator!!!!!!! BAKION

 

Bihar abenduaren 21ean, astelehenarekin, negua etorriko da. Hori dela eta, Bakioko Berbalagun taldeak "Neguko solstizioari buruzko" hitzaldia antolatu zuen, Txakolingunean. Aritza Bergara, idazlea, izan zen hizlaria eta benetan zenbat ikasi genuen!!!


Ia 40 lagun bildu ginen han, jakinmina bakarrarekin, historian zehar nola ospatu dugu euskaldunok solstizioa? Bada, Euskal Herriak, beste herri zaharrek bezala, aspalditik ospatu ditu solstizioak

 

 

"Gaur egun egutegi finko daukagu, baina hau ez da beti horrela izan. Mendeetan zehar, kristautasuna lehen eta zientziak beranduago, Euskal Herrira ailegatu eta haien ideiak zabaldu baino lehen, jendeak denbora markatzeko ilargiaren zikloak eta lurra eta eguzkiaren arteko posizioek naturan eragiten zituzten aldaketa ziklikoak jarraituz lortzen zituzten haien erreferentziak. Horrela, antzinako ospakizunak eta ohiturak egutegi horrekin lotura zeukaten (inauteriak, udako eta neguko solstizioak...) edo, baita ere, eguneroko biziarekin (uzta jasotzearekin)".... 

Horrela hasi zen Aritzaren hitzaldia, guk hor utziko dugu hurrengokoei "spoilerrik" ez egiteko. Baina, egia da biziki gozatu genuela haren berbekin eta benetan biziki ikasi genuela...

Eskerrik asko etorri zineten guztioi, baita Aritzari ere, beti bezala, plazer handia izan zen zurekin egotea. 

Portzierto, hitzaldi horri esker beste kide bi izango ditugu gure artean. Ondo etorriak izan zaitezte, eta urte askotarako gurekin egotea espero dugu.

Zatoz guregana eta gozatu euskaraz!!!

Birusak ez gaitu mututuko!!!!

2020/12/04

Talo tailerra. MARURI-JATABEN

 

Txorizoa, hirugiharra, odolostea, gora txerrikiak!!!! Eta gora taloak!!!!

Baina nola? Ez dakizu euskal taloak egiten eta ikasi nahi duzu?
Horrela bada, ez GALDU HURRENGO AUKERA.

Maruriko berbalagun taldeak Talo tailerra antolatuko du, datorren abenduaren 18an. Ondo pasatu nahi baduzu eta gure ohiturak ezagutu nahi badituzu, etorri guregana.

Gogoratu izena aldez aurretik eman behar dela, plaza mugatuak baitira, beraz, badakizu deitu edo bidali whatsapp-a 688 87 54 81 telefonora. Ez zara damutuko.


            Zatoz eta bizi euskaraz!!

2020/12/03

Euskara Maruri-Jataben, Gatikan eta Bakion

Gaur, abenduak 3, Euskararen Nazioarteko Eguna da. Gure hizkuntzaren eguna, beraz, guztion eguna da.Gaur, abenduak 3, Euskararen Nazioarteko Eguna da. Gure hizkuntzaren eguna, beraz, guztion eguna da.

Alabaina, agian, ez dakizue nondik datorren ospakizuna? Bada, gaur azalduko dizuegu eta zalantza guztiak argituko dizkizuegu.

Gaurko eguna, abenduak 3, Frantzisko Xabierren eguna da. Frantzisko 1552ko abenduaren 3an hil zen, eta, kondairak dioenez, hil aurreko haren azken hitzak bere ama-hizkuntzan izan ziren, hau da; euskaraz.

1949an Eusko Ikaskuntzak ezarri zuen egun hau euskararen nazioarteko egun gisara. 1995ean Eusko Jaurlaritzak eta Euskaltzaindiak bat eginik, Euskararen Nazioarteko Eguna instituzionalizatu zuten.
 
Horrenbestez, gaur Euskararen Nazioarteko Eguna da, baina guk egunero bihotzetik ezpainetara eramaten dugu gure altxorrik nagusiena, hau da: EUSKARA.

Berbalagun Taldeen helburua euskara zabaltzea da. Hori dela eta, Gatikakoak asteartero biltzen dira, Gure Txokoan.
Bakioko Berbalagun kideek kiroldegian dute hitzordua, asteazkenero...
eta ostiralero paseoa egiten.
Marurikoak, ordea, kultur etxean elkartzen dira, ostiralero, eta benetan ederto batean egoten dira.
Haiek egiten duten bezala, egin dezagun topa!!! zorionak euskarari!! zorionak guztioi eta eutsi goiari!!!

2020/12/01

Neguko solstizioari buruzko hitzaldia. BAKION

Oso garai zaharretatik euskaldunok sua gurtu dugu eta sua erabili izan dugu solstizio eta ekinozioen inguruko jai erritualetan. Neguko solstizioan ere sua protagonista dugu, eta gure arbasoek abenduaren 24ko gauean enbor handi berezia erretzen zuten etxeko tximinian. Subilaro, Olentzero edo Eguberri enborra deitu izan zaio eta orain dela oso gutxi arte oso zabalduta izan den usaia edo ohitura dugu. Oraindik ere, zenbait etxetan egin egiten dute. Errito hau eguzkiaren jaiotza ospatzeko egiten zuten, edo beste modu batez esanda, eguzki jaioberriaren ohorez.

Aritza  Bergarak, idazleak, neguko solstizioari buruzko hitzaldia emango du  abenduaren 16an, Txakolingunean, arratsaldeko 18:00etan.

Harekin batera ohitura zaharrrak ezagutuko ditugu, eta egia esan, jakintza hori behar dugu non gauden eta nora goazen bideratzeko.

Hori dela eta, etorri guregana eta gozatu!!!!

2020/11/09

Paseoa euskaraz ere bai!!!!

Kaixo, lagunok!!

Lehenengo asteburua joan zaigu taberna eta jatetxe barik. Hori dela eta,  ostalaritza behin itxita, horrek Berbalagun  taldeetan eragin handia dauka, gutako batzuk, orain arte, tabernetan batu izan baikara. Baina guk baditugu beste aukera batzuk egoera horri aurre egiteko.

Gatikako taldea Guretxokoan bilduko da asteartero, arratsaldeko 18:00etan.

Maruriko taldeak Kultur etxea erabiliko du ostiral guztietan, arratsaldeko 18:00etan.

Bakioko asteazkeneko taldeak kiroldegian bilduko dira, ostiralekoak, ordea, paseoa egingo du, eta berbapaseolagun talde bat sortu dute. Hona hemen Bakioko leku zoragarri batean.

Zaindu burua eta maite duzun hori, beti euskaraz!!!!

2020/11/06

Gu ere Euskaraldian!!!

Kaixo, ekipo!!!

Zelan  joan da astea? Beno hemen gatozkizue gogorarazteko Euskaraldia gertu daukagula eta izena eman behar duzuela.

Zuek badakizue Berbalagun taldea arigunea dela, hala ere, berbalagun kide guztiok izena eman beharko dugu. Ez arduratu sasoiz gaude.

Oraindik izena eman ez baduzu, egin klik lotura honetan https://izenematea.euskaraldia.eus/
Txapa jasoko duzue herriko ohiko lekuetan.

Aurten gehiago, gehiagorekin eta gehiagotan egingo dugu!

2020/11/03

Maruri-Jatabeko taldea

Kaixo talde!

Joan den ostiralean ederto batean egon ginen. Maruriko berbalagun taldeko lehenengo protagonistak emakumeok izan ginen. Dirudienez eta azkenengo ikerketek diotenez, emakumeok gara euskara gehiago zabaltzen duguna, hala ere, pertzepzio hori hautsi nahi baduzu etorri guregana, eman izena eta gozatu euskaraz.

Astea amaitzeko eta han esan genuen bezala, igandean Jatara igo ginen eta  panorama liluragarria izan genuen aurrean

 

2020/10/30

PRAKTIKATU ONLINE ERE BAI!!!!!!!


COVID-19ak konplikatu ditu herritarron arteko kontaktuak, horregatik, euskaraz online praktikatzeko aukera berriro zabaldu nahi dugu.

ZER EGIN BEHAR DA PARTE HARTZEKO?
1. Behean dagoen loturan aukeratu modalitatea: AURREZ AURRE, ONLINE, ala BIETARA.
2. Markatu nahiago d(it)uzun egun(ak) eta ordutegia(k)

Parte hartzea DOHAINIK da 👌, gainera, izena ematen dutenen artean 10 SARI-KUTXA 🎁 zozketatuko ditugu.

Animatu eta eman izena > http://emanizena.praktikatu.eus/



2020/10/27

Gatikan, Bakion eta Maruri-Jataben martxan gaude dagoeneko

Kaixo ekipo!!

Zer moduz zaudete? Joan den astean, Uribe Butroeko eskualdean Berbalagun aurkezpenak egin genituen, eta benetan saio interesgarriak izan ziren.

Lehenengoa Gatikan izan zen. Bertan, Akaitze Kamiruagak, Labayruko Fundazioko ikertzaileak, "Gatikako baserriak" liburuan bertoko eraikinei buruzko egindako ikerketa sakona zabaldu zuen, eta a zer nolako aberasgarria izan zen!!!! zenbat ikasi genuen!!! Benetan!! Ohiturak, toponimia, arkitektura, denetarik. Eskerrik asko Akaitze eta etorri zineten guztioi.

Horrekin batera, hurrengo Euskaraldian Gatikako Berbalagun taldea Arigunea izango dela argi geratu zen eta hona hemen familia-argazkia.

Hurrengo hitzordua Bakion izan genuen. Berbalagun eta Euskaraldiaren aurkezpenarekin batera Aitor Txarterinak egindako bakarrizketarekin gozatu genuen.  

Barre egin genuen, baita jende berria ezagutu ere.

Eta amaitzeko astea Marurin ere berbalagun programa aurkeztu genuen, ostegunean bertan izan zen. Hori dela eta, gurekin bertoko protagonista izan genuen, hau da, Jordi Estanyol eta haren euskararekiko harremana ezagutu genuen, ibilbide luzea eta oparoa izan du Jordik, Catalunyako seme honek,  euskaldun peto-petoa bihurtu arte.

Noski, Maruriko Berbalagun taldea Euskaraldiaren Arigunea izango dela, eta hona hemen jarriko dugun aurpegiaren argazkia.

Hurrengo egunak konplikatuak izango dira, baina guk jarraituko dugu hala edo nola euskara zabaltzen.

Adi egon, jakinaren gainean egongo baitzarete.

2020/10/16

Maruri-Jatabeko Berbalagun aurkezpena

Kaixo lagun!!

Zer moduz zoaz? Zure euskararekiko maitasuna, nola doa?

Agian oraindik ez daukazu norekin egin berba, era horretan, euskaraz hitz egin nahi baduzu, baina ez daukazu norekin, euskalduna izanda euskaraz bizitzeko aukera berrien bila bazabiltza, horrela bada, Berbalagun ekimena da behar duzuna.  Gurekin euskara praktikatuko duzu, jende berria ezagutuko duzu eta gozatuko duzulakoan gaude.

Berbalagun programa aurkezteko Jordi Estanyol alpinistarekin hitz egingo dugu, haren eskarmentua kontatuko digu. 

Era horretan, jakin-mina sortu badizugu etorri aurkezpenera. Datorren ostegunean, URRIAK 22, izango da, Kultur Etxean, arratsaldeko 19:30ean.

Berbalagun izateko prest zaude?


   ZATOZ ETA GOZATU EUSKARAZ

2020/10/15

Bakioko Berbalagun aurkezpena

Kaixo, lagun!!!

Dagoeneko udazkenean gaude. Urtaro polit honetan indarberrituta sartu gara eta etorkizunari aurre egiteko prest gaude, prest bai, baina beti euskaraz.

Hori dela eta, datorren astean bi ekimen aurkeztuko ditugu; alde batetik Euskaraldia eta bestetik, Berbalagun programa. Bakioko Berbalagun taldea herriko erreferentea da, eta aurten Euskaraldiarekin batera bat egingo du.

Aurkezpen egunean Aitor Txarterinaren eskutik “Euskaratik Mundura abiadura hiperbolean” bidaia egingo dugu. Txarterina idazle emankorra, ipuin kontalari nekaezina, umorista burutsua, hori guztia eta gehiago da egun horretako emalea eta berarekin gozatuko dugu.

Era horretan, jakin-mina sortu badizugu etorri aurkezpenera. Datorren asteazkenean, URRIAK 21, izango da, Txakolingunean, arratsaldeko 18:00etan.  

    ZATOZ ETA GOZATU EUSKARAZ

2020/10/14

Gatikako Berbalagun aurkezpena

Kaixo, lagun!!!

Zer moduz sartu zara udazkenean?  Euskaraz bizitzeko gogoa baduzu, hona hemen paregabeko aukera bat, hau da, BERBALAGUN.

Aurten Gatikako programak 6 urte beteko ditu, hori dela eta, Berbalagun taldea herriko eta euskara erreferente bihurtu da. Astean zehar denetarik hitz egiteko prest biltzen gara giro alaian, ikasturtean askotariko ekimenak abiatzen ditugu: lehiaketak, familientzako tailerrak, autu-mautuak, hitzaldia, tailerrak... 

Era horretan, jakin-mina sortu badizugu etorri aurkezpenera. Datorren asteartean, URRIAK 20, izango da, Gaztetxokoan, arratsaldeko 18:00etan. Hitzordu horretan Akaitze Kamiruagak Gatikako baserriak liburuan bertoko eraikinei buruzko ikerketa sakonari buruz hitz egingo du, hori dela eta, Berbalagun programa aurkezpenarekin batera berton diren baserriak ezagutuko ditugu.

   ZATOZ ETA GOZATU EUSKARAZ

 

2020/09/16

Berbalagun 2020-2021

 

Kaixo lagun:

Zer moduz zaude? Uda amaitzear dagoela eta, ikasturte berri polit hori prestatzen ari zarelakoan gaude. Zure euskara maila bermatu nahi baduzu, jende berria ezagutu nahi baduzu Berbalagun programa aukera paregabea  eta zabala da.

Laster, Uribe Butroeko berbalagun taldeak martxan izango dira. Etorri guregana eta gozatu euskaraz.

PRAKTIKATUetaBIZI

2020/07/29

Uda ona izan!!!!!!!!!

Uztaila amaitzear dago, eta horrekin batera Berbalagunen ikasturtea. Aurten, gogorra izan denez, oporrak behar ditugu. Hori dela eta, batzuk mendira joan/joango dira, beste batzuk hondartzara, igerilekuetara edo etxe ondoko zelaietara... berdin dio non edo nora, izan ere, garrantzitsuena da hemen gaudela, eta denbora dugula bizitza gozatzeko.
Irailaren 15ean berriro egongo gara zuekin. Ikasturte interesgarria bezain garraintsua dugu aurretik, izan ere, erronka asko izango ditugu: Euskaraldia, korrika,... Berbalagunok hor egongo gara euskara bihotzean eta ahoan.

Ondo pasa eta zaindu, denok osasuntsu behar zaituztegu eta.
Birusak #EzGaituMututu
#PraktikatuetaBizi
 

2020/07/23

Bakion udan: musikoterapia

Hilabetea aurrera doa, eta horrekin batera Bakioko Berbalagunek Bakion udan ere euskaraz programako jarduerak amaitzear ziren atzo.  Uztaileko laugarren asteazkenera jo genuen bart eta laugarren eta azken saiora iritsi ginen. Atzoko ekintza musikarekin lotuta etorri zen eta eginiko musikoterapia tailer horretan han bildu ginen emakumeok barnean dugun sormena kanpora atera genuen.

Zuriñe Inzunzak, biolinistak eta terapeutak, erakutsi zigun  barruan musikaria daukagula, era horretan, egiaztatzeko eta izotzaldia urtzeko, kontzertu txiki bat eman genuen. Horren ostean, "trantze mistiko" batean sartu ginen, izan ere, lasaitzeko ez dago musika bezalakorik, horrela sentitu genuen guk behintzat, musikak paradisu magiko batera eraman baikintuen. Lasaitasun horretatik atera ondoren musikarekin burmuinan irudikatu genuen "bizipoza" hura mandala batean margotu genuen.


Saioa amaitzeko, ausartu ginen abesti baten bertsioa egitera. Hona hemen "Uda arraroa".
Hurrengoa klasiko batena: "Uda aroa" izenarekin.
Horiek horrela, aurtengo Bakion udan ere euskaraz programa amaitutzat eman behar dugu, baina berbalagun taldeak ostiralero jarraituko du biltzen.
Izugarrizko gozamena izan da niretzat zuekin arratsalde hauek partekatzea, eta espero dut datorren urtean, zuek eta beste batzuk ere, guregana etortzea.
Bien bitartean, gozatu uda arraro honetan baina betiere uda aro honetan irri batekin eta euskaraz, noski.

2020/07/16

Bakion udan: Euskal Kantagintza

Atzo, uztaileko asteazken guztietan bezala, eta atzokoa hirugarrena izan zen, Euskal Kantagintza ezagutzeko aukera paregabea izan genuen bertoko Berbalagun taldeak antolatutako Bakion udan ere euskaraz programari esker, hain zuzen ere. Hirugarren honetan Andoni Tolosa "Morau" abeslari, idazle, irrati-esatari, zutabegile eta musika aditua izan genuen anfitrioi.

Mixel Labeguerie izan zen gure lehenengo protagonista, izan ere, Euskal Kantagintzaren aita bera da, eta bart argi geratu zen, Bakioko eskolako aterpean. Labeguerieren eragina eta haren abestiak ez ziren ezezagunak bertan zen publikoarentzat.           
                                       Gero etorri zen Euskal Herrian sortutako Ez Dok Amairu, abangoardiako mugimendu kulturala. Talde  multidisziplinarra bezala sortu zen, izan ere, Euskal Kantagintza Berriaren atzean Mikel Laboa, Benito Lertxundi, Lurdes Iriondo, Xabier Lete, Jexux eta Joxean Artze abeslariak eta musikariak  izan ziren, besteak beste... alabaina han ere izan ziren, Oteiza eta Basterretxea eskultoreak, Sarrionandia eta Irigarai idazlea eta poeta...
 
Andoni Tolosarekin batera 60ko eta 70eko hamarkadetara bidaiatu genuen eta garai hartako abestiak entzun genituen.

Baina ez ginen han geratu, era horretan,  atzokoa bidaia oparoa izan zen. XX. mendeko azken hamarkadetako errepasoa egin zuen "Morauk" gure garaira iritsi arte.  Atzo argi geratu zen  egun ezin dugula euskal kantagintzaz hitz egin musika estiloez baizik. Baina hura beste istoria bat da.

Saioa amaitzeko Andoni Tolosak sekulako bertsioa egin zuen, ezetz asmatu zein izan zen. Eskerrik asko Andoni, plazer handia izan zen zu ezagutzea eta zurekin hainbeste ikastea.
Eskerrik asko etorri zineten guztioi. Gogoratu datorren astean musikoterapia tailerra izango dugula Bakion udan ere euskaraz programaren barruan eta aldez aurretik izena eman behar dela.

2020/07/09

Bakion udan: bakarrizketa

Bakioko Berbalagun taldeak antolatutako udako bigarren ekintzarekin hitzordua izan genuen atzo arratsaldean, uztailak 8, hain zuzen ere. Txiki bakarriztari gipuzkoarra izan zen atzoko protagonista eta benetan zein ondo pasa genuen, zenbat barre bota genuen eta zenbat oroitzapen ekarri zizkigun gogora, izan ere, joandako hamarkadak izan genituen hizpide.
Su ta Gar taldearen musikarekin hasi zen saioa eta Benito Lertxundirekin bukatu genuen, horiekin batera gure gaztaroa berrikusi genuen, hau da, kami marradun haietaz, Nuklearrik? Ez, eskerrik asko txapaz, kalimotxoz, larunbateko kontzertuaz oroitu ginen. Gaztaroko urteak, zein ederrak izan ziren, baita barregarriak ere!!!
Eta ez, ez dugu "spoilerrik" egingo, baina "guay del paraguay" izan zen atzoko bakarrizketa.
Hurrengo bideoan Txikiren eskerrak.
Gogoratu datorren asteazkenean Bakion udan ere euskaraz programan Euskal Kantagintza saioa izango dugula, Andoni Tolosarekin. Ez galdu aukera, ederto batean izango garelakoan nago. Leku berean, hau da, eskolako aterpean eta ordu berean, hau da,  arratsaldeko 19:00etan. Ez ahaztu izena aldez aurretik eman behar duzuela, beraz, badakizue bidali whatsappa; ziur gaude ez zaretela damutuko.


2020/07/02

Bakion udan: Txotxongilo ikuskizuna

Atzo asteazkenarekin, uztailak 1, hilabetea estrenatu genuen, baita Berbalagunek antolatzen duen Bakion udan ere euskaraz programa ere.
Gure lehenengo hitzordua El tenderete antzerki konpaniarekin izan zen.  Bermeotarrek  "Basoko ipuinak" eta "Bola gazta gusta jata" txotxongilo ikuskizunak ekarri zituzten Burgo mendiaz harainditik.
Covid-19 dela eta, zorrotz jokatu genuen eta inor ez kutsatzeko segurtasun-neurri guztiak bete genituen. Hori dela eta, aldez aurretik izena eman behar zen, izan ere, 50 lagunek baino gehiagok eman zuten izena, baina edukiera mugatua zegoenez, 50ek parte hartu zuten. Berbalagun taldeko kide baten laguntzarekin, dena primeran joan zen, bai sarreran bai irteeran. Eskerrik asko, Laura, beti prest egotearren!!!!.

Horiek horrela, biziki gozatu genuen Manyarekin eta Litorekin, ekarritako istoriotxoekin eta haiek sortutako pertsonaiekin, bai eskuko txotxongiloekin, baita harizko txotxongiloekin ere.
Plazer handia izan zen guretzat zuekin topo egitea, eta atzoko arratsalde euritsu horretan plan ezin hobea izan zen.

Eskerrik asko zuei, eta eskerrik asko Bakioko publikoari, zuek ere domina merezi duzue, segurtasun-neurri guztiak bete izan zenituztelako.

Gogoratu datorren asteazkenean, uztailak 8, Txiki artistak bakarrizketa saio bat egingo digula, leku berean, hau da, eskola aterpean. Emanaldia helduentzat denez arratsaldeko 19:00etan hasiko da eta parte hartzeko izena ere aldez aurretik  eman behar da.